ఇష్టారాజ్యంగా పీ హెచ్ డీ అడ్మిషన్లు..

 ఇష్టారాజ్యంగా పీ హెచ్ డీ అడ్మిషన్లు..

నిబందనలకు విరుద్దంగా పీ హెచ్ డీ సీట్ల కేటాయింపులు..

తమకు అనుకూల అభ్యర్థులకు అనుగుణంగా నియమాలు మార్పు..

పాలకమండలి ఆమోదం లేకుండా పీ ఎచ్ డీ నియమాలు మార్చిన కేయూ వైస్ చాన్స్ లర్..

 

వెంకటేశ్వర్లపల్లి/ తెలంగాణ:

వరంగల్ లోని కాకతీయ విశ్వవిద్యాలయంలో మొదటి కేటగిరికి చెందిన పీ హెచ్ డీ అడ్మిషన్లు నిబంధనలకు విరుద్దంగా జరుగుతున్నాయని విద్యార్ధి సంఘాలు ఆరోపణలు చేస్తున్నా, అధికారులు పట్టించుకోవడం లేదనే విమర్శలు వెల్లువెత్తుతున్నాయి. గత డిసెంబర్ 20న మొదటి కేటగిరీ లో పీ ఎచ్ డీ అడ్మిషన్లకు కాకతీయ విశ్వవిద్యాలయం నోటిఫికేషన్ ను జారీచేసింది. పరిశోదనా ఫెల్లోషిప్ లు కలిగిన వారు మరియు ఎం ఫిల్ రెగ్యులర్ విధానంలో పూర్తిచేసిన వారు ఈ నోటిఫికేషన్ ద్వారా దరఖాస్తు చేసుకోవచ్చని పేర్కొన్నారు. యూజీసి రెగ్యులేషన్స్-2016 ప్రకారం ఈ పీ ఎచ్ డీ మొదటి కేటగిరీ నియమ నిబందనలు అమలు అవుతాయని కూడా నోటిఫికేషన్ లో పేర్కొన్నారు. ఆ తర్వాత నిబందనలను సవరిస్తూ మళ్ళీ గత యేడాది డిసెంబర్ 28 న మరొక నోటిఫికేషన్ ను కాకతీయ యూనివర్సిటీ సైన్స్ డీన్ విడుదల చేశారు.

యూ జీ సి నిబందనల ప్రకారం మొదటి కేటగిరీ పీ ఎచ్ డీ అడ్మిషన్లకు కేవలం ఫుల్ టైం రిసెర్చి స్కాలర్స్ మాత్రమె అర్హులు. పార్ట్-టైం రిసెర్చి స్కాలర్స్ మొదటి కేటగిరీ పీ ఎచ్ డీ అడ్మిషన్ పొందేందుకు అర్హులు కారు అని స్పష్టంగా పేర్కొన్నారు. యూ జీ సి నియమ నిబంధనలను అనుసరించాలంటే ఆ యా విశ్వవిద్యాలయాలు వర్సిటీ పాలక మండలి మరియు అకాడమిక్ సెనేట్ యొక్క స్టాండింగ్ కమిటీ ఆమోదం పొందవలసి వుంటుంది. కాని ఆమోదం పొందినటువంటి నియమ నిబందనలను కాకతీయ వర్సిటీలో అధికారులు పక్కన పెట్టి తమకు అనుకూల అభ్యర్థులకు పీ ఎచ్ డీ అడ్మిషన్లు ఇచ్చేందుకు రంగం సిద్దం చేసుకున్నారు. ఇందుకు గాను అకాడెమిక్ సెనేట్ యొక్క స్టాండింగ్ కమిటీ ఆమోదం పొందిన పీ ఎచ్ డీ అడ్మిషన్ నిబందనలను సవరిస్తూ మే నెల 28 న డీన్స్ కమిటీ తో సిఫారసు చేయించి అదే రోజు కె యూ రిజిస్ట్రార్ ఉత్తర్వులు (No.699/B3/KU/2022, 28-05-2022) జారీ చేశారు.  25 శాతం సీట్లను ప్రభుత్వ డిగ్రీ, పీ.జీ కళాశాలల్లో పనిచేసే వారు నో ఆబ్జేక్షన్ సర్టిఫికేట్ ద్వారా పార్ట్-టైం పీ ఎచ్ డీ కింద మొదటి కేటగిరీ పీ ఎచ్ డీ లో అడ్మిషన్ పొందవచ్చని సవరించిన ఉత్తర్వుల్లో పేర్కొన్నారు. వర్సిటీ పాలకమండలి మరియు అకాడెమిక్ సెనేట్ యొక్క స్టాండింగ్ కమిటీ ఆమోదం లేకుండా ఇష్టారాజ్యంగా నిబందనలు మారుస్తూ మొదటి కేటగిరీ పీ ఎచ్ డీ అడ్మిషన్లు చేస్తున్నారని విద్యార్ధి సంఘాలు విమర్శిస్తున్నాయి. రెండవ కేటగిరీ పీ ఎచ్ డీ అడ్మిషన్ నోటిఫికేషన్ లో పార్ట్-టైం అడ్మిషన్ పొందే అవకాశం ఉన్నప్పటికీ, కేవలం రిసెర్చ్ ఫేల్లోషిప్ పొందిన వారికి ఇచ్చే మొదటి కేటగిరీ పీ ఎచ్ డీ అడ్మిషన్లలో పార్ట్ టైం అడ్మిషన్లు ఇవ్వడంతో పూర్తీ స్తాయి పీ ఎచ్ డీ చేయాలనుకునే వారికి నష్టం కలుగుతుందని విద్యార్థులు వాపోతున్నారు.

ఇప్పటికే దాదాపు అన్ని విభాగాల్లో ఇంటర్వ్యూలు నిర్వహించారు. పార్ట్-టైం వారికి కూడా అడ్మిషన్లు ఇచ్చారని ఫిర్యాదులు రావడంతో వెంటనే వారికి అనుకూలంగా నిబందనలను సవరిస్తూ పాలక మండలి, అకేడిమిక్ సెనేట్ ఆమోదం లేకుండానే గతంలో ఆమోదం పొందిన నిబందనలను మారుస్తూ ఉత్తర్వులు తీయడంపై సర్వత్రా విమర్శలు వస్తున్నాయి.